好彩我地分配得好好....哥哥。麗麗。妹妹 一間房,
我。Pat。爸。媽 一間房, 哈哈....我地真係plan 得好
今日要帶佢地去食豆漿油炸鬼....爸爸媽媽最愛
8:45am 準時出發....西門町搭捷運--->善導寺站 5號出口 (車程 5 mins)阜杭豆漿
地址: 台北市忠孝東路一段108號 2F營業時間: 05:30 am - 10:30 am
話咁快就到左啦....我地早左黎....所以冇咁多人!但係都要排隊....
餐牌上....有好多食物名稱我地都唔知係咩?(e.g. 蛋卷? 飯團? 蔥花蛋? 夾餅?)去到就是但每樣叫左d....大家share食!見住佢一邊整一邊賣,感覺都好食d
原來飯團 = <痴>飯, 蛋卷 = 薄餅加蛋, 蔥花蛋 = 蔥花炒蛋
哈哈....我地覺得最好食係飯團(痴飯)....入面好足料,油炸鬼仲好脆!
凍熱豆漿都好滑好重豆味,我估佢仲加左腐竹....
爸爸都要左碗咸豆漿....同樣好味!!
食完條隊已經排到落地下....好彩我地早左黎姐
10:00 am 下一站就係...地下街....由於時間尚早....好多店舖都未開門!
我地即刻轉移陣地.....去左糖村買手信先...
地址:台北市大安區敦化南路一段158號
掛住買野唔記得影相....
糖村 d鳥結糖好好味ga!11:00 am其實唔係行左好耐....但係爸爸隻腳已經痛了,大家又好熱....
咁我地又改行程...去左 鼎泰豐 坐低食d野,休息一下 (順便等對面個間古典玫瑰園 開門)
地址: 台北市忠孝東路四段218號
時間還早,店裹得兩三台客人...哈哈...大把時間....
咁我地就飲杯啤酒消消暑
,叫左幾個冷盤食住先啦! ( 為左消磨時間)涼拌黑木耳。干煸四季豆。紹興醉雞
食食下....就叫左d小食....酸辣湯。蟹粉小籠包。雞肉小籠包。菜肉蒸餃。鮮肉包。菜肉包。紅油抄手
小籠包...皮薄多汁
媽媽極力推介<鮮肉包。菜肉包> 媽媽話 未係過咁好食既包....熱辣辣, d 肉汁必曬出黎...哈哈....誇張!食飽飽....就拎左部寶利萊出黎影下相先...
點解我幫人影個d張張都咁靚....人地幫我影個d都差d?
12:30 pm 玩完一輪... 古典玫瑰園 終於開門!
地址: 台北市大安區忠孝東路4段216巷11弄10號 (鼎泰豐對面)呢一間係我同事上次去完台灣話好好飲....今次專登要買番ga!
就等我地試下你有幾好飲....我地真係攪攪震!每隻味既冰茶都試暈...這款冰茶係用水果 玫瑰 曬乾磨成粉製成,飲完好透心涼....
NT$300/ 罐, 一買就買左 11罐
好似唔使錢咁....
買野買到一抽二抽,加上又落雨....1:30 pm 決定番酒店附近按摩店放鬆一下....
呢間按摩店非常正....上年黎按過一次,已經覺得好舒服,d穴位好到位....爸爸隻腳行一陣就痛....一定要帶爸爸黎嘆番一下....
我地6個就按左一個小時,爸爸太辛苦了,所以按多我地一個小時!
<梳呼>完我地自由活動... 爸爸留在按摩店繼續嘆, 我地6個再戰西門町!!
同麗麗去買黑橋牌做手信....同表妹去買衫& 搵大屎伯....行巴黎草莓買寶藝MASK....
真係行極都行唔完.... 不過妹妹就冇咩野岩行
買野買到冇手拎....先肯番酒店....抖一陣就出去食飯lu!
昨晚已經BOOK左台....8:30 pm 食 麻辣一村 ,好多人....記得要book位呀!
地址: 台北市忠孝東路四段98號 (Bistro 98) 8樓
我地7個人要分開兩張台坐....好彩都係隔離姐....
NT$549 +10%服務費 任飲任食 包湯底....
仲有Movenpick 雪糕任食....一坐低就食左兩杯雪糕先,即刻覺得自己抵曬....
湯底方面...
因為我。爸爸。媽媽都唔食得麻辣,所以我地要左....美白牛奶鮮魚湯 + 蕃茄疏菜湯
而哥哥佢地....就要左....麻辣湯底 + 蕃茄疏菜湯
食物方面....樣樣都好新鮮....特別係d 肉類
脂肪分佈平均,肉質鮮嫩!
正....
11:00pm 食飽飽....搭捷運番酒店沖白白,訓覺覺豬lu!
沒有留言:
張貼留言